Zamboanga del Sur – Magpabilin sa Alert Level 2 ang probinsya sa Zamboanga del Sur kauban sa Zamboanga Sibugay, Zamboanga del Norte ug Isabela City, Basilan sugod karong Marso 16 hangtod Marso 31, 2022 subay sa anunsyo sa Inter Agency Task Force (IATF) kagahapong adlawa.
Tungod niini, extended kun gilugwayan usab ang mga gipatumang guidelines sa lalawigan basi sa Executive Order No. 2022-03 ni Governor Victor Yu.
Ilawom sa maong klasipikasyon, mas luag pa gihapon ang quarantine guidelines nga ipatuman sa probinsya nga nagsunod sa guidelines sa IATF.
Base sa sumbanan sa alert level 2, ang mga indoor nga kalihokan sama sa meetings, conferences, ug uban pa, tugotan lamang hangtod sa 50% venue capacity, lakip ang face-to-face classes alang sa mga gitugotan nga mag face-to-face classes sa Basic Education ug Higher Education.
Samtang 70% usab sa mga outdoor activities kon ang tanang empleyado sa buhatan nakakompleto sa bakuna batuk COVID-19 ug estriktong masunod ang minimum health protocols.
Sa travel protocols, gikinahanglan lamang ang vaccination card ug ID kung gikan sa alert level 2 ang mga mobiyahe pasulod sa Zambosur.
Gitubag usab sa Provincial Task Force ang pangutana sa katawhan kung ngano dili Alert Level 1 ang probinsya nga nagkaubos naman ang Covid-19 cases niini. Adlawng Mierkules, mitala na lamang og 11 ka aktibong kaso sa COVID-19 ang lalawigan basi sa update nga gipagawas sa IPHO.
Segun sa giya sa DOH, usa sa requirement aron mahimong Alert Level 1 gikinahanglan nga moabot og 70% ang fully vaccinated population sa Zamboanga del Sur. Sa pagkakaron anaa pa lamang sa 51% ang kumpleto og bakuna sa probinsya.
Gikatakdang magpahigayon og laing ‘vaccination days’ ang Provincial Government sa musunod nga semana aron mausbawan ang ihap sa mga bakunado dinhi sa Zamboanga del Sur.
(Source: ZDS Press Bureau, photo courtesy of ZDS IATF)