LIG-ON ang baruganan ni Gov. Peter M. Unabia nga lakip sa iyang prayoridad ang kahimsog sa panglawas sa tanang molupyo sa Misamis Oriental. Mao man gani nga sa pagbisita sa mga doctors gikan sa Department of Health ug Northern Mindanao Medical Center (NMMC) sa iyang buhatan ning bag-o, deretso gisultihan sa Gobernador nga andam kini motabang sa pagtubag sa panginahanglanong medikal sa maong balay tambalanan kutob sa iyang magahum.
Didto sa pakigpulong sila si DOH Region X Director Dr. Jose R. Llacuna, Jr.; ug NMMC Chief of Hospital Dr. Jose C. Chan, kinsa naghangyo nga paluyohan ang ilang mga lakang alang sa kaayohan sa labing nagkinahanglan.
Matud ni Gov. Unabia, lakip sa iyang PAGLAUM development agenda ang efficient health and social services delivery dinhi sa entero Misamis Oriental. (PIO)