Nagmalampuson ang Urban Container Household Gardening (UCHG) ‘Panagtagbo’ kon “Market Day” nga gisalmotan sa Pantawid Pamilyang Pilipino Program (4Ps) gardeners gikan sa Barangay 22, 31, Balubal, Consolacion, Gusa, Kauswagan, Macabalan, Patag ug Puntod, Pebrero 28, diha sa city hall mini park, ning siyudad.
Atol sa maong kalihukan, nasakmit sa barangay Gusa ang cash prize nga balor P5,000 isip first placer sa cooking contest, samtang nakuha sa barangay Balubal ug Barangay 31 ang cash prize nga P4,000 ug P3,000 alang sa second ug third placer.
Sa most creative booth, nahimong first placer ang barangay Gusa lakip ganti nga P10,000, samtang nasakmit sa Barangay Balubal ug Barangay 22 ang P8,000 ug P6,000 cash prize alang sa second ug third placer.
Ang maong kalihokan gipangulohan sa City Inter-agency Committee (CIAC), uban sa City Social Welfare and Development Department (CSWD), Agricultural Productivity Operations Office (APOO), City Health Office – City Nutrition Committee ug City Local Environment and Natural Resources Office (CLENRO) uban sa temang, “Building a self-sustaining community through Urban Container Household Gardening (UCHG).
Gihingusgan ang adbokasiya sa UCHG sa panahon sa pandemya sanglit usa kini ka pamaagi aron maangkon ang ‘food sufficiency’ pinaagi sa pagpananom og mga utanon ug lagutmon diha mismo sa ilang tugkaran.
Mitambong sa kalihokan sila si APOO Assistant Department Head Engr. Mae Ann Cayetuna, APOO Agribusiness Division Head Archie Alamban, City Nutrition Action Officer Nenita Rabe, ug CSWD Assistant Department Head Nida B. Paña ug CLENRO representative Pria C. Tacandong, lakip mga barangay council.
(Source: CDO-CIO, photo courtesy of CSWD)
