Cebu City – Patay ang usa ka suspetsadong drug pusher nga giingong misukol sa mga polis atol sa buy bust operation sa Brgy. Catarman, Cordova, Cebu gahapon sa kaadlawon.
Giila sa kapolisan ang ilang napatay nga si Joven Silong nga mulupyo sa sityo Maghaway 2, brgy. Pasil, Cebu City.
Nasakmit gikan kang Silong ang pinutos sa gituhoang shabu nga motimbang og tulo ka kilo ug mobalor og 20.4 milyones, .45 kalibreng pistola, ug motorsiklo nga gigamit sa illegal nga negosyo.
Suma pa sa hepe sa kapolisan sa Cordova, Captain Ramil Dugan, nakabantay si Silong nga polis ang nakig-deal kaniya hinungdan milanit siya sa iyang pistola aron unta pusilon ang decoy hinungdang giunhan sa polis sa makatulo.
Gilusad ang buy bus operation uban sa abag sa Provincial Intelligence Unit (PIU), Philippine Drug Enforcement Agency (PDEA), Cebu Police Provincial Office (CPPO), PNP Drug Enforcement Group, ug 1st Provincial Mobile Group Company (PMFC).
Nagpadayon pa ang kapolisan pag-imbestigar sa kaso ni Silong aron pag-ila sa iyang supplier ug kakonsabo.
(Jhon Tadlip/JTY)
(Source: PDEA 7, photo courtesy of Cordova Police Office)