BuCor chief pinatatawag ng DOJ kaugnay sa ulat ng pagkamatay ng ilan sa ‘Bilibid 19′

Nakatakdang ipatawag ni Justice Secretary Menardo Guevarra si Bureau of Corrections (BuCor) Director General Gerald Bantag bukas, Hulyo 20.

Ito’y para tanungin si Bantag hinggil sa ulat ng pagkakasawi umano ng mga high profile inmate ng New Bilibid Prisons partikular na ng ‘Bilibid 19’ dahil sa COVID-19.

Sa inilabas na pahayag ni Guevarra, kinumpirma nito na nasabihan siya ni Senate President Tito Sotto hinggil sa nakarating sa kaniyang ulat kaya’t nais niyang maliwanagan dito.

Magugunitang ibinunyag ni Sotto na walo sa mga tinaguriang ‘Bilibid 19’ kabilang na sina Francis Go at Amin Buratong sa mga nasawi dahil sa COVID-19 mula pa nuong Mayo at na-cremate na ang mga labi nito.