Gipakusgan pa karon ang BHERT (be-hert) sa tibuok probinsya sa Sarangani aron paspas mahibal-an sa mga barangay ang makonsiderang PUM kon person under monitoring ug PUI o person under investigation kung matakbuyan sa sakit nga 2019 Coronavirus Disease o CODIV-19, ang bag-ong pangalan nga gibansag sa World Health Organization sa 2019 Novel Coronavirus (2019-nCov).
Wala pa man nabalita ang coronavirus ug una pa man naghatag og kamanduan si DILG Secretary Eduardo Año nga mugnaon ang BHERT, dugay ng na-organisa sa Provincial Government sa Sarangani pinaagi sa Sulong Kaligtasan program ni Governor Steve Chiongbian Solon ang BHERT kon Barangay Health Emergency Response Team nga gilangkuban sa libuan ka mga aktibong BHW o barangay health worker entiro Sarangani Province. May ginadawatan silang monthly allowance gikan sa Kapitolyo gawas pa sa ginadawat usab nila gikan sa ilang mga barangay ug munisipyo.
Sa Coronavirus Task Force sa Sarangani, ang mga myembro sa BHERT ang katugbang sa mga municipal-provincial health team ug sa DOH nga mangayo og detalye sa indibidwal o sa ilang mga silingan nga gikan sa abroad sa travel history ug uban pang impormasyon alang sa “contact tracing” samtang ga-mandatory self-quarantine sulod sa katorse (14) ka adlaw.
Samtang, nagpasidaan si Sarangani Provincial Health Officer Doctor Arvin Alejandro nga kadtong gikan sa gawas sa nasud nga naigo sa coronavirus disease ang ilang lugar nga gigikanan o dili ba kaha gikatahapan nga nakadikit sa tao nga gikan sa abroad, nga nakasinati og pag-ubo, sip-on, hilanat, lisod sa pagginhawa ug naay kalibanga, ang muadto gayud dayon sa municipal health office ug municipal hospital aron madapatan og mga tambal, sintomas kini sa CODIV-19.
Dili lang matud pa mag-panic, inay maging alerto sa pagsunod sa mga direktiba, sa pagsuporta kana nila Senador Manny ug Congressman Ruel Pacquiao, Sangguniang Panlalawigan ug tanang mayores-kapitanes.
