Pinabaro ti City Government ti Laoag ti Sisterhood Agreement iti Honolulu County iti Hawaii , a nairanta nga ad-adda a maitandudo ti bilateral relations ken palubosan dagiti Hawaiian-Ilocanos a mangtakuat manen kadagiti ramutda.
Sangapulo ket lima a delegado manipud iti Honolulu City Council, nga idauluan ni Tyler Dos Santos-Tam ti District 6, ti immay iti pannakapirma ti pannakapabaro ti katulagan ti panagkakabsat iti auditorium ti Laoag City Hall.
Pinasangbay ida ni Mayor Michael Keon ken dagiti kameng ti Konseho ti Siudad babaen ti pangngaldaw iti bangkete.
Kinuna ni Keon, iti ababa a bitlana sakbay ti pormal a pannakapirma ti tulag, nga immuna a naipasdek ti katulagan ti panagkakabsat idi Hulio 15, 1969, babaen ti Honolulu Resolution 247.
Kinuna met ni Tam a segseggaan na ti pannakapapigsa ti singgalutda iti ekonomia ken idurduronna ti panagsubli ti panagtayab ti Honolulu-Laoag tapno malukatan dagiti baro a gundaway, mapapigsa ti panagsinnukat ti aramid, ken maitandudo ti sustainable agriculture ken education excellence, pakairamanan ti turismo ken kultural nga aktibidad.
(Rod Sadian)
(Source: LGU-Laoag)