Kas paset ti panangselebrar ti probinsia iti 32nd Library and Information Services Month, iyusuat manen ti Ilocos Norte Provincial Library ti Pop-up Library iti sanguanan ti Provincial Capitol.
Kangrunaan a gagem iti Pop-up Library nga iwanwan dagiti kameng ti Provincial Library babaen iti panangidaulo ni Mr. Eric Coloma ket tapno itandudo pay iti panagessem iti panagbasa, saan laeng a kadagiti ubbing ngem ketdi amin nga kakailian.
Segun kenni Ms. Grace Justo, maysa kadagiti agpapaay iti Provincial I-hub, babaen iti Pop-Up Library, ditoy a maiplastar dagiti nagduduma ti klasena a mabalin a basaen kas kadagiti magazine, pocketbook ken dadduma pay a libro para kadagiti ubbing.
Malaksid iti daytoy, inlawlawag pay ni Justo a mangiyusuat da pay ti storytelling kadagiti ubbing iti parke ken agibunong da kadagiti nagduduma a mabalin a basaen dagiti ubbing ken dagiti interesado a kakailian..
Atendaranto daytoy nga aktibidad ni Gob. Matthew J. Marcos Manotoc ken agserbi a naisangsangayan nga sangaili ni Eng.Rey M. Parnaci, OIC Regional Director ti DICT Region 1. (Irene Ringor)
(Source: Provincial Government of Ilocos Norte)
