Pannakaitibker ken pannakapabileg dagiti agtutubo ti nangruna a panggep ti naisayangkat a Laoag City Youth Parliament, a nangipakita iti kinapateg ti akem dagiti agtutubo kas sumaruno a lideres iti siudad.
Napagsaritaan dagiti wagas ti panangisagana kadagiti agtutubo iti panangidaulo ken pannakadengngeg ti boses da mainaig iti local government ken nation building. Maysa kadagiti nangibingay iti adal babaen kenni secretary Oscar Valenzuela, chairperson ti dangerous drugs board a nangisuro maipanggep iti akem dagiti agtutubo iti pananglapped ken panangipasardeng iti panagusar ti illegal a droga.
Sigun kenni Mayor James Bryan Alcid, napateg a ma-develop dagiti agtutubo iti liderato ken mapagtalkan iti pannakikadua ti gobierno siudad babaen iti nadumaduma a programa a naiparang-ay para kadakuada. Immatendar pay ti aktibidad da Vice Mayor Rey Carlos Fariñas, Councilor Jaybee Baquiran, Assistant Secretary Gervy James Gumarit, Commissioner-at-Large ti National Youth Commission, Michael Christophe Agustin, SK Federated President Harold Domingo, Local Youth Development Officer, ken dagiti speakers a nangibingay iti expertise da iti nadumaduma a topiko a makatulong iti pannakabalin dagiti agtutubo.
Babaen iti programa, manamnama ti lokal a gobierno a mapapigsa pay ti partisipasion dagiti agtutubo iti panagserbi iti komunidad.
By:Niña Tabilos