Kiniddaw a mismo ni First District Representative Ferdinand Alexander “Sandro” Marcos iti tulong iti Department of Public Works and Highways (DPWH) iti pannakadalus dagiti karayan pakairamanan iti pannakaikkat dagiti narway a water lily ti Daorao Creek iti Barangay Caaoacan, iti Ciudad ti Laoag kas panagsagsagana iti possible a mapasaran a panaglayus iti panawen ti panagtutudo.
Kuna ni Ryan Remigio, Head of Office ni Congressman Marcos iti umuna a distrito ti ilocos Norte nga insigida a nangipatulod iti DPWH iti Amphibious Excavator ken insigida a nangrugin a nagdalus iti nasao a karayan.
Inlawlawag ni Remigio a dagiti opisyal ti Barangay kadagiti madalanan iti nasao a karayan ti nagkiddaw kenni Diputado Marcos tapno masolbar iti nasao a problema agsipud ta kada tawen ket isu ti mangipapaay kadakuada iti pannakalayus no dumteng iti bagyo wenno napigsa a tudo. (April Joyce Gonzales)
(Source: 1st District Congressional Office)