Umadanin malpas amin ti gobierno probinsial babaen ti Metro Ilocos Norte Council wenno MINC a maipaayan ti tulong dagiti driver dagiti trisikelan iti nadumaduma nga ili ken siudad ditoy probinsia.
Daytoy ket kalpasan nga ti pannakaipaay ti tulong kadagiti trisikelan ti ili a dingrasiti babaen ti Pantawid Pasada Program.
Segun iti gobernador, tallo gasut sangapulo ket siyam dagiti nabenipisaran iti nadakamat nga ili.
Inbunannagna a tunggal maysa ket naipaayan ti “ gas voucher “ nga agbalor ti sngaribu a pisos ken “ Insurance card “.
Inlawlawag ti gobernador a kaipapanan daytoy a no mainaig iti desgrasya dagiti trisikelan ket mabalin nga ibaklay ti gobierno probinsial ti agingga iti limapulo ribu pisos.
Impalgakna a ti naipaay kadagiti benepisiario ket paset pay laeng iti budget para iti napalabas a tawen.
Mainaig iti daytoy, inpakaammona nga ita a tawen 2022 ket mapagbalin a tallo ribu a pisos ti “cash assistance” nga ipaay ti probinsia kadagiti kakailian a pakairamanan dagiti agipaspasada iti trisikel iti intero a probinsia.
Inpanamnamana nga agtultuloy ti Pantawid Pasada Program ti gobierno probinsial para kadagiti kameng ti Tricycle Operators and Drivers Association wenno TODA ditoy Ilocos Norte gapu ta ibilang ti gobernador a karaman dagitoy kadagiti kangrunaan a naapektaran iti pandemia a ginubuay ti COVID-19
Innayon ni Gob. Manotoc a kalikagumna a maipalawa pay ti nasao a programa ti gobierno probinsial tapno ad-adu pay a kakailian ti matulungan. (Rosita Macalipis)
(Source: Provincial Government of Ilocos Norte)