Nangrugin ti gobierno probinsial babaen iti Ilocos Norte Tourism Office wenno INTO iti maikadua a bansada a panagibunong iti suweldo kadagiti napukawan iti pagtrabahuan a nanggundaway iti programa ti probinsia.
Maipalagip nga inrubwat ti gobierno probinsial dagiti sumagmamano a socio-economic recovery programs tapno maalay ayan iti epekto ti pandemia gubbuay ti covid 19.
Maibilang ditoy iti Tourism Livelihood Continuity Program wenno TLCP a naipaima iti Ilocos Norte Tourism Office.
Ti nasao a programa ket nairanta kadagiti saan a nakapagoperar kangrunaan iti negosio ti turismo nga immunan a naikkat iti pagtrabahuan.
Ni Gob. Matthew Marcos Manotoc kadua na ni Economic Consultant Mr. Sandro Marcos a nagibunong iti suweldo dagiti 80 displaced tourism workers iti ili a Pasuquin, Burgos ken iti ili a Bangui.
Agpapada nga immawat dagitoy iti uppat a ribu a pisos.
Kabayatan na, nagyaman met dagiti benepisyaryo iti biang ti probinsia kangrunaanna kenni Gob. Marcos Manotoc kagiddan iti panangibatad da a dakkel a tulong daytoy kadakuada nangruna ita a panawen ti krisis gapu iti pandemia.
(Source: Provincial Government of Ilocos Norte)