Awan ti plano ni Gob. Matthew Marcos Manotoc nga agbalin a presidente ti League of Provinces of the Phil.
Inannugotna a kinasarita ni Gob. Dakila Carlo ” Dax ” Cua ti probinsia ti Quirino ken agdama a chair ti LPP tapno daytoy ti itandududa a mangidaulo iti liga dagiti gobernador ditoy pagilian.
Nupay kasta, impalgakna a nagkedkedanna daytoy a diaya kenkuana gapu ta tarigagayna a maipamaysa ti panagserbina ditoy probinsia.
Malaksid iti daytoy, impetteng ti gobernador nga adu pay dagiti gobernador nga ad – adda a kualipikado iti nasao a posisyon ngem isuna.
Impatalgedna nga uray saan a daytoy ti agbalin a presidente ti liga dagiti probinsia ket sindadaan a mangipaay ti naan – anay a suporta kas kameng ti nasao a liga.
Inlawlawagna a no umawat ti nayun a trabaho ket kaykayatna ti agbalin nga aktibo iti Regional Development Council wenno RDC agsipud ta binalakadan ni Pres. Ferdinand R. Marcos Jr. wenno PBBM a makipartisipar iti RDC.
Mamati ni Gob. Marcos Manotoc nga iti administrasyon ni PBBM a nakasadag iti National Economic Development Authority wenno NEDA ket dakkel nga oportunidad para iti panagdur – as ti ekonomia ti probinsia ti panagbalin nga aktibo iti RDC.
Mainaig iti daytoy, kunana a mabalin nga irekunsiderarna ti panagbalinna a chairman ti RDC ditoy rehion uno. (Cheena Arzadon)
(Source: Provincial Government of Ilocos Norte)