Nagadal ni Gob. Matthew J. Marcos Manotoc ti agrikultura iti Mariano Marcos State University (MMSU).
Inlawlawagna a paset daytoy iti napinget a kalikagum a maaddaan ti pormal a pannakaammo iti agrikultura tapno al-alisto a maawatanna ti pagkasapulan dagiti mannalon ditoy probinsia.
Imbatadna a nagpatulong kenni Dr. Shirley Agrupis, Presidente ti MMSU ken ti College of Agriculture iti nadakamat a pagadalan para iti pannakatungpal ti nasao a kalikagumna.
Segun iti gobernador, kinaduana ti Chief of Staff na a ni Atty. Pancho Jose a nagadal ti agrikultura gapu ta daytoy ti focal person wenno addaan ti bileg a mangibagi kenkuana a mangaramid ti desisyon pakaseknan ti agrikultura nangnangruna ket adu ti pakakumikumanna iti pananglaban ti COVID-19.
Impalgakna nga adda ti direktibana ken ni Atty. Jose a mangisentro ti imatangna iti agrikultura gapu ta napinget ti tarigagayna a dumur-as ti agrikultura ditoy probinsia ken adu dagiti mannalon a masapul a matulongan nangnangruna kadagiti nakasadag iti mapastrekda kadagiti maapitda a produkto.
Inbunannagna a naaddaanda ti lima agingga iti innem a zoom session ken kalpasanna ket nagatendarda iti final session.
Kunana a saan laeng a nayon nga adal iti benneg ti agrikultura ti nasursurona ngem napatibker pay ti pannakikammayetna iti nasao nga unibersidad a mabigbig nga umun-una iti agricultural research, agri-business ken iti product processing.
Innayon ni Gob. Marcos Manotoc a napipintas dagiti kagamitan ti unibersidad ket namnamaenna nga umanamong ti MMSU para iti panagkammayet ti gobierno probinsial ken ti unibersidad iti product processing ken iti agri-business.
(Source: Provincial Government of Ilocos Norte)