Cebu City – Gipahibawo sa Regional Disaster Risk Reduction Management Office o RDRRMO-7 nga ang bagyong Dante nakamugna og landslide ug pagbaha sa mga lalawigan sa Bohol ug Cebu, apan wala hinuoy nabiktima.
Atol sa press conference gahapon, si Neil Balaba, division chief saRDRRMO-7, miingon nga bisag dili direktang naigo sa bagyo ang Central Visayas nga adunay radius nga 50 ngadto 100 ka kilometro, apan nakasinati kinig pag-uwan nga nagbuntag.
Sa Sugbo, usa ka taxi ang gi-anod sa kusug nga baha ug ni-abot kini sa Sitio Paray, Barangay Kasambagan, Dakbayan sa Sugbo.
Ang Bohol ang mas apektado diin labing menos 164 ka pamilya ang namakwet sa luwas nga dapit sa lungsod sa Candijay, Loboc, Balilihan, Lila, ug Loay.
Aduna usay gikatahong pagdahili sa yuta sa Loboc apan walay naunsa sanglit gipahiklin na man daan ang mga nagpuyo.
Wala pamaklaro pila ka kabtangan ang nadaot ug pilay danyos.
Hinuon, kagahapon, matod ni Balaba, nakabalik na ang mga pamilya sa ilang pinuy-anan diin gitabangan sila sa ilang tagsatagsa ka local government units.
Samtang sa Sugbo, ginagmayng landslides ang gikataho sa Talisay City, Cebu City, ug ubang lugar apan walay dinagkong kadaot nga nahatag. (Jhon Tadlip/JTY)
(Source: Regional Disaster Risk Reduction Management Office – 7, photo courtesy by Suzanne Jabas Duhig)
(Video courtesy by Melvin Comahig Pacaña)