Cebu City – Nakadawat na ang Central Visayas sa labing unang shipment sa bakuna sa Sputnik V nga gama sa Russia.
Si Dr. Mary Jean Loreche, tigpamaba sa Department of Health o DOH-7, mikompirmar sa kutay sa mga mensahe nga gipada sa media nga ang rehiyon gigahinan og 300 ka ampoules sa vaccine.
Matod ni Loreche, ang usa ka ampoule maisip nga usa ka dose.
Suma pa ni Loreche, ang bag-ong nangabot nga bakuna nga gama sa Gamaleya Research Institute sa Russia gamiton sa mga tawong nalista ubos sa subgroups A1 to A3, nga mao ang mga medical front-liners, senior citizens, ug persons with comorbidities.
Midugang siya nga uwahing alokasyon sa Sputnik V gitumong sa first dose ug ang sunod nga shipment mao na alang sa second dose.
Ang 300 ka doses sa Sputnik V nga gipada sa Central Visayas kabahin sa initial shipment sa 15,000 ka doses nga nadawat sa Pilipinas. (Jhon Tadlip/JTY)
(Source: DOH-7, photo courtesy of PTV Cebu)