Gibutyag ni Cebu City Emergency Operations Center (EOC) head ug Councilor Joel Garganera, Marso 1, 2021, nga gitakdang moluwat si Mayor Edgardo Labella ug bag-ong executive order sud ning semanaha.
Matod ni Garganera nga ang EOC miduso na sa ilang rekomendasyon ngadto sa buhatan ni Labella labot sa pagpaluag na sa guidelines sa mga byahedor ug mga turista.
Subay kini sa bag-ong guidelines sa IATF nga nagtangtang sa RT-PCR test results ug quarantine isip rekisitos sa pagsud sa mga byahedor o turista sa Syudad sa Sugbo gawas lang kong i-require sa Local Government Unit (LGU) nga ilang padulngan.
Matod sa IATF, ipaubos lang sa kwarantina ang biyahedor kon makita nga nagdakinig mga sintoma sa coronavirus disease o Covid-19.
Ang naasoy ng mga lagda gisabak sa Resolution No. 101 nga giaprobahan sa IATF niadtong Biyernes sa tuyo nga ma-standardize ang travel protocols sa kamad-an, kahanginan ug kadagatan.
Gitangtang nausab sa IATF ang documentary requirements sa mga travelers.
Wala na pod kinahanglana ang travel authority gikan sa Joint Task Force on Covid Shield ug giwala na usab ang health certificates.
Ang mga APOR o authorized persons outside residence nga gikan sa mga ahensiya sa nasodnong kagamhanan ug attached agencies, kinahanglang mopresentar og ID, travel order ug travel itinerary ug kinahanglan mo pasar sa symptom-screening sa ports of entry and exit.
Rekomendasyon sa DOH-7
Sa ilang bahin, girekomendar sa Department of Health o DOH-7 nga kinahanglang ipabilin sa mga siyudad sa Sugbo, Mandaue, ug Lapu-Lapu ang requirement sa resulta sa real-time polymerase chain reaction o RT-PCR testing sa mga biyahedor.
Sa iyang mensahe sa teks sa media, si Dr. Mary Jean Loreche, tigpamaba sa DOH 7, miingon nga dili maayong ihunong sa tulo ka HUCs o highly urbanized cities ang current policy sa pag-require sa negatibong resulta sa RT-PCR test sa mangabot nga mga pasahero.
Suma pa ni Loreche, buot lang nilang maneguro nga luwas sa virus ang mangabot nga mga biyahedor o turista sa tulo ka HUCs.
Base sa Inter-Agency Task Force IATF Resolution 101, dili tanan sa mga travelers ang gi-require pagpaubos sa RT-PCR test apan subject sila sa regulations sa LGU o local government unit.
Kon ang LGU makahukom pag-require og usa, limitado kini sa RT-PCR ug wa nay laing tests nga i-request.
Matod ni Loreche, di sila gusto nga madugangan pa ang nagsaka nga mga kaso sa coronavirus disease sa tulo ka dagkong siyudad pinaagi sa mga dumuduong. (Jhon Tadlip/ JTY)
(Source: Emergency Operations Center -Cebu City | IATF | DOH-7, photo courtesy of Philippine Coast Guard)