An September 5, 2020 jaoy isa ka tawo na nusuyod nan Siargao tapos diri sa ato sa GL nuhuya, base sa guidelines sija makonsidera na isa ka turista, pero an ija tagpresenta na mga requirements is jaon para sa mga Authorized Person Outside of Residence (APOR) para makakuha nan mga dokumento para makalarga. Buot pasabot na an ini na tawo an ija ra tagsinpakita an ija RAPID TEST RESULT NA NEGATIVE. Sukwahi ini sa ato guidelines nan Surigao del Norte na kun turista kaw gani kinahanglan gajud na an imo ipresenta an imo RT-PCR kun SWAB TEST RESULT. Amo jaon tag ajo gajud nan ato mga otoridad an resulta nan swab test. AN RESULTA NAN IJA SWAB TEST KAY POSITIVE. Sa pagsuta, an ini na tawo baja daan na may ija resulta nan swab pero taghatag nija sanan tag presenta an September 7, 2020 na na kun buot hunahunaon daan na jaon sa ija an resulta September 3, 2020 pa.
Tungod nan ini, nag conduct dajon an RHU nan contact tracing, an pasyente isab tagpadaya didto sa Surigao Mainland didto sa ato Provincial Facility. WAYAY LOCKDOWN NA KINAHANGLAN HIMUON SA BISAN HAI NA AREA, tungod tanan na sa contact tracing negative raman sa rapid test sanan ato sila kuman tagpa quarantine sab nan 14 days lakip an boatman na naghatod cleared with proper disinfection protocols.
INI NA KLASE NA PROBLEMA MAS MAKAT-UNAN UNTA NATO TANAN KUN MAN GALING AN TURISMO NAN SIARGAO ABREHAN NA GAJUD. Para sa safety nan tanan, amo balikon ini na mga punto:
- PARA SA MGA ACCREDITED ACCOMMODATIONS, siguraduha nijo na jaoy actual na mahipakita na RT-PCR (SWAB) TEST RESULT NA NEGATIVE. Para luwas sab an ijo mga staff sanan tanan tawo diri.
- Para mas sajon an contact tracing an jaon ato mga turista na dawaton striktuhon ta gajud na dili makagawas sa ato resort or sa ila kwarto suyod sa 14 days sanan tumanon dapat ini sa tanan panahon.
- Pirmi gajud ato an turista ajuan nan ila health declaration kay para an pag gather nan information mas paspas.
- SA TANAN TURISTA NA MUBYAHE, siguraduhon gajud na tanan papeles kumpleto.
- An social distancing sanan pagsukbot nan mask importante gajud na pirmihon.
Salamat sa tanan tabang sanan kooperasyon. Padajon kita sa ini na buhat. Ingats, General Luna!
(RHU General Luna)