Cagayan de Oro – Alayon sa panglantaw sa administrasyon ni Mayor Rolando `Klarex’ Uy nga mapalambo ang agrikultura ug pagpangisda ingon man pagpalambo sa food security sa syudad gipailawom sa fish processing training ang mga miyembro sa Bonbon Active Fisherfolk Association (BAFA) bag-ohay lang.
Pinaagi sa inisyatiba sa Agricultural Productivity Operations Office (APOO) ang pagbansay gisentro sa paghimo og Spanish-style sardines ilabina nga isdang tamban ang kanunay makuha sa mga mananagat diha sa Barangay Bonbon.
Si APOO Head Engr. Paterno Gonzales mipasabot nga tumong usab sa maong kalihokan nga mahatagan ang mga mananagat og igong kahanas kalabot sa value-adding processes aron matubag ang sobra nga supply sa isda sa merkado.
Pinaagi sa giya ug technical expertise sa mga personahi sa Agribusiness Development Division sa APOO, miresulta sa malampuson nga outputs ang pagbansay sa mga mangingisda diin 20 ka botelya sa Spanish-style sardines ang ilang nahimo sa tulo ug tunga ka kilo nga Tamban.
Ang maong kalihokan nagpalig-on sa commitment sa administrasyon ni Mayor Klarex nga mahatagan og gahum ang mga barangay ug pagpalambo sa malungtaron nga gawi sa agrikultura ug pangisda.
News and photo by Cheleste Simene