General Santos City – Gipangunahan ni Gensan City Mayor Lorelie Geronimo Pacquiao ang pagpanghatag sa DSWD AICS (Assistance to Individuals in Crisis Situations) sa KCC Convention Center kagahapong adlawa, Nobyembre 26, 2024.
Ang mga benepisyaryo sa programa naglakip sa 496 ka mga residente gikan sa Guardian’s Hill, Barangay Bawing, ug 220 ka mga benepisyaryo gikan sa nagkalain-laing sektor, apil na ang mga vendors ug sektor sa transportasyon sa Ligaya.
Nakadawat usab og hinabang pinansyal gikan sa Barangay Apopong ang mga sakop sa sektor sa transportasyon. Matag usa kanila nakadawat og P2,000 isip kabahin sa inisyatiba nga gipangulohan ni Mayor Lorelie Pacquiao.
Ang pundo gikan sa 1Pacman Partylist, nga girepresentahan ni Liga ng mga Barangay (LNB) President Bobby Pacquiao, ug isip kabahin sa padayon nga suporta sa lokal nga kagamhanan sa mga sektor nga nanginahanglan og tabang.
Matod ni Mayor Pacquiao, ang katuyoan niini nga serbisyo mao ang paghatag dayon nga tabang sa mga pamilya nga naapektuhan sa krisis, ug pagpauswag sa kaayohan sa tanan sa ilang komunidad.
Kini nga inisyatiba usa ka pruweba sa pasalig sa lokal nga gobyerno sa pagpalig-on sa mga sektor sa komunidad ug sa paghatag ug patas nga suporta sa mga lumulupyo sa General Santos. (Rem Agdon)
(Source: LGU-GENSAN/CMO)