Sulod sa tulo ka semana pa lamang, mikita na ug ₱ 114,824 ang Taboan sa Enhanced Gasang Bahandianon sa Umahan (E-GBU) Program nga anaa nahimutang sa Office of the Provincial Agriculturist, Turno ning dakbayan sa Dipolog.
Kini ang nasayran gikan ni Ms. Judy Gondula, ang Team Leader sa Marketing sa E-GBU sa maong buhatan.
Ang klase-klaseng utan nga gibaligya sa maong taboan nagagikan sa farmers association sa E-GBU dinhi sa probinsya mao ang pipino, ampalaya, talong, kalabasa, balatong, pechay, tambuali, sequa, okra ug aduna usay sweet corn nga mitala ug 5,575 kilos ang nahalin.
Gipasabot ni Ms. Gondula nga ang Taboan sa E-GBU tuyo nga gipatukod ni Governor Roberto Uy pinaagi sa Office of the Provincial Agriculturist sa pagpangulo ni Provincial Agriculturist Maybel Bustaliño aron matabangan ang mga mag-uuma nga resipiente sa E-GBU Program sa pagbaligya sa ilang produkto aron mapalambo ang ilang kapanginabuhian.
Ang Taboan sa EGBU gibuksan kaniadtong Hulyo 23.
Nasayran nga ang EGBU Program hingpit nga gisuportahan ni Governor Uy alang sa natad sa agrikultura ug buot niya kining himuong legasiya atul unya sa paghuman sa iyang termino isip gobernador sa Zamboanga del Norte.
Sulod sa pito ka bulan aduna nay 211 ka farmers association sa nagkalain-laing barangay ning probinsya ang natukod sukad sa paglingkod pagbalik ni Provincial Agriculturist Maybel Bustaliño sa maong buhatan.
Gilauman nga mahuman na sa pag-organisar ang gitarget nga 280 ka farmers association karong tuiga alang na sa E-GBU program. (OIC Lyza Bautista, RPN DXKD Dipolog)
(Source: Provincial Information Center – Zamboanga del Norte)