PUNO sa kasadya ang Palaras Sa Tago-Ulohan, fluvial parade atol sa 6th Cantago Festival sa Tagoloan karong gabhiona.
Kini adunay temang: “Suba sa Tagoloan, gasa sa Dios ug sa mahal nga Birhen sa Candelaria, atong ampingan ug panalipdan”.
Kini pagpakita sa kahayag agi’g pagtoo ngadto sa ilang patron, Nuestra Señora de la Candelaria ug pag-amuma sa ilang kasubaan.
Gibutyag ni Tagoloan Mayor Atty. Nadya Emano-Elipe nga mahinungdanon kini agi’g pagpasalamat usab sa tanang kalamposan nga naangkon sa lungsod.
Giawhag usab ni Mayor Nadya ang katawhan nga duyogan ang uban pang nakahan-ay nga kalihokan.
Samtang pinakaunang higayon ning tuig 2025 nga gihimong indigay ang maong kalihukan. Gisalmotan kini sa napulo ka barangay nga pulos mipakita sa kultura sa Tagoloan pinaagi sa maanindot nga disenyo sa ilang mga balsa.
Ang maong parada gisugdan sa Pugaan River sa Brgy. Mohon, Tagoloan alang sa blessing ceremony pinaagi ni Rev. Fr. Roberto Balsamo, Jr. ug briefing & orientation uban sa Philippine Coast Guard, MDRRMO ug Oro Rescue Tagoloan. Gitapos sa docking area ubos sa Tagoloan Bridge sa Brgy. Poblacion.
Dunay kinse ka balsa nga gilangkoban alang sa Birhen, ni Mayor Nadya, Mr. Jaylord Adame isip representante ni Cong. Bambi Emano, Provincial Board Members Saysay Emano ug Mary Kate Temple, Sangguniang Bayan officials, Municipal Department Heads, barangay contingents ug STREAM founder.