Cagayan de Oro City – Ang 4th Infantry Division (4ID) sa Philippine Army nga nakabase sa Kampo Evangelista ning syudad sa Cagayan de Oro nagpahigayon sa usa ka press conference kagahapong adllawa tungod sa ilang donation drive alang sa mga apektado sa bagyong Ulysses. Kauban sa ilang kampanya ang local government unit sa syudad sa Cagayan de Oro ug sa non-government organization nga Balay Mindanao diin ang nasangpit nga kampanya gitawag nila ug, #CagayanDeOroHelpsCagayanValley.
Gipasabot ni 41D Commander Major General Andres Centino ang panginahanglan sa pagtabang sa Cagayan Valley human gihapak sa katalagman, Iyang gihulagway nga ang nahitabo sa maong lugar nakapahinumdom sa nahitabo sa Cagayan de Oro niadtong Bagyong Sendong sa 2011.
Tungod kay sila military adunay kapasidad sa pagdala sa mga relief goods ngadto sa area pinaagi sa aircraft, nanawagan sila nga bisan unsang tabang ang matunol gikan sa lokal nga dapit, dako na kaayo kinig matabang sa mga naapektuhan sa kalamidad. Ang tumong sa maong kampanya mao ang makatabang.
Sa mga gusto mopaabot sa ilang tabang mahimong tawgan ang G7 sa 41D sa cellphone number: 09176886658. (Philippine Information Agency-10)