Zamboanga del Sur – Patay sa pagpamusil ang usa ka 34-anyos nga babaye samtang paingon kini mokuha sa iyang 4Ps payout sa lungsod sa Lapuyan, Zamboanga del Sur, bandang ala-una sa hapon adlawng Huwebes.
Giila ang biktima nga si Samira Tagadtal Mayo, minyo ug dunay lima ka anak, lumulopyo sa Brgy. Pampang, coastal barangay sa Lapuyan, Zamboanga del Sur.
Sa inisyal nga imbestigasyon, padulong ang maong biktima sa sentrong bahin sa lungsod aron pag-withdraw sa iyang cash card sa 4Ps. Pagnaug niini gikan sa pumpboat, misakay kini og tricycle apan samtang pagawas na sila sa pantalan, kalit lamang dunay miagi nga duha ka lalaki nga naka-bonnet sakay sa ilang motorsiklo ug gipusil ang biktima.
Nakaangkon og igo-pinusilan ang biktima sa iyang kalawasan hinungdan sa iyang hinanaling kamatayon.
Swerteng wala maigo ang driver sa tricycle nga si Loloy Catubig nga naghapa-hapa samtang nagmaneho sa iyang motor.
Miikyas ang mga suspetsado sakay sa ilang motorsiklo.
Narekuber sa crime scene ang unom ka mga basiyo sa bala sa wala pa matinong kalibre sa pusil.
Nagpadayon na ang imbestigasyon sa kapulisan aron madakpan ang mga suspek sa krimen. (rb23TMJ)
(Source: ZDS Lapuyan, photo courtesy by Reynold Lacanilao)