Cebu City – Gipahibaw sa Department of Health-7 nga ilang i-redistribute ug gamiton isip first dose ang tanang bakuna sa AstraZeneca nga miabot sa rehiyon aron segurong magamit sa dili pa ma-expire karong Mayo.
Si Dr. Mary Jean Loreche, tigpamaba sa DOH-7, mi ingon nga ilang kuhaon sa mga ospital ang mga stock sa bakuna nga gitagana alang sa second dose ug iapod-apod kini sa temporary treatment & monitoring facilities, emergency operation centers ug ubang healthcare facilities alang sa first dose.
Gitataw ni Loreche nga wala kiniy labot sa global concerns labot sa safety sa AstraZeneca vaccine.
Mikabat og 30 mil ka doses sa bakuna sa AstraZeneca batok sa Covid-19 ang miabot sa Sugbo niadtong Marso 10.
Suma pa ni Loreche, sa maong gidaghanon, 29,500 ka doses ang naapod-apod sa mga ospital ug ang pagpamakuna nagsugod pagka Marso 16.
Kaduha idapat ang bakuna sa gintang nga unom ngadto sa 12 ka semana apan ang DOH mirekomendar aron paghatag og igong paernahon sa lawas nga makarekober. (Jhon Tadlip/JTY)
(News & photo courtesy of Department of Health-7)
