Cebu City- Nagkauyon ang 35 ka mayor sa Cebu pagpaubos sa self-quarantine ug dili mopaduol ni bisan kinsa nunot sa ilang pagbiyahe sa Metro Manila.
Si Mayor Christina Frasco sa Liloan, presidente sa League of Municipalities of the Philippines (LMP) Cebu Chapter, mikompirmar sa nasabotan sa 35 sa 44 ka mayor sa lalawigan nga nakatambong sa national convention sa LMP sa usa ka hotel sa kaulohan niadtong Marso 9.
Si Mayor Ferdie Estrella sa Baliuag, Bulacan, nga usa sa mitambong sa kombensiyon namatud-ang hitaptan sa coronavirus disease kun Covid 19.
Segun pa sa statement ni Frasco, nagmabinantayon ang mga mayor sa Cebu sa maong event ug wa kini makapaduol kang Estrella sa hawanan sa hotel.
Gani, matod ni Frasco, walay usa sa 35 ka mayor nga nagpakitag sintoma sa sakit, siyam ka adlaw gikan sa kombensyon.
Pero bisan kon wala makapaduol kang Estrella ang mga mayor, magpaubos gihapon kini sa self-quarantine aron pagseguro.
Sa sayo pa, gipahibawo ni Gob. Gwendolyn Garcia nga makigtagbo siya sa mga mayor ugma aron pagtuki sa mga lakang nga angayng buhaton paglikay ug pagpugong sa coronavirus disease.