Cebu City- Gihingusgan pa sa kagamhanan sa dakbayan sa Sugbo ang mga pamaagi pagpugong sa pagkatap sa coronavirus disease kun Covid 19 pinaagi sa pagpasera og dugang establisimento.
Gawas sa recreational space, gambling place, ug concerts hall, gimando usab ni Mayor Edgardo Labella ang temporaryong pagtak-op sa mga mol, spa, sports center ug internet café.
Kini nunot sa kompirmasyon sa unang kaso sa Covid 19 sa dakbayan sa Mandaue.
Gipasabot ni Labella nga ang pagpasera sa naasoyng mga establisimento makapadasig sa mga tawo pagpabilin lang sa ilang balay ug dili na manggawas aron makig-uban sa tapok sa daghang tawo nga kuyaw sa pagtakod sa virus.
Alihan usab sa mga balay-patigayon ang mga dapit diin sagad magtapok ang mga tawo sa normal nga mga adlaw.
Hinuon, pabiling bukas ang mga supermarket, banko, money transfer, botika ug hardware store busa mahimo gihapong makapalit ang mga tawo sa ilang kinahanglanon.
Gidasig usab sa mayor ang publiko nga kon mahimo magpabilin lang sa panimalay gawas lang kon motrabaho o naay gustong paliton.