Mipaabot sa iyang dakong pagpasalamat si Nila Lalona, ang Auditor sa Barangay Health Workers sa dakbayan sa Dapitan ngadto ni Governor Roberto Uy human nila nadawat ang P3,600 nga honorarium.
Kini ang gipadayag ni Lalona atul sa pagpang-apudapud sa maong kantidad ngadto sa 330 ka barangay health workers sa Dapitan kaniadtong Pebrero 4, sulod sa Zamboanga del Norte Convention and Sports Center.
Nanghinaut ang maong ginang nga hatagan pa sa hataas nga kinabuhi si Governor Uy aron mas makatabang pa siya dili lamang kanilang barangay health workers kondili sa katawhan sa Dapitan tungod kay naghandum sila sa gobernador.
Si Governor Uy sa iyang mensahe, ang nagkanayon nga dili lamang barangay health workers ang mahatagan sa maong honorararium kondili lakip na ang barangay nutrition scholars ug day care workers.
Dugang sa gobernador nga kinahanglan usab ang barangay nutrition scholars nga mahatagan ug honorarium aron matabangan ang problema sa malnutrisyon dinhi sa probinsya.
Gipamahayag usab ni Governor Uy nga ning panahon sa pandemya, dili ikalimud nga dako ang gikatabang sa mga barangay health workers sa pagsumpo sa gikahadlukan nga virus.
Gipahibalo ni Governor Uy nga ang maong honorarium matag tuig na kini nilang madawat tungod kay aduna na ordinansa niini.
Si Kanhi Dipolog City Mayor Evelyn Uy nag-awhag sa mga partisipante nga kinahanglan magkahiusa alang sa kalambuan sa Dapitan.
Samtang si Vice Mayor Jimboy Chan sa Dapitan nagpasalamat ni Governor Uy sa gihatag niini alang sa barangay health workers.
Nanghinaut ang batan-ong Bise Mayor nga mahatagan sa probinsya ang kinahanglan nga gamit sa barangay health workers sama sa bp apparatus, timbangan ug thermometer.
Niini, si Governor Uy wala nagmakuli sa pagtubag nga kini mahatag sa hintungdan sulod sa tulo ka bulan sanglit sa gobyerno, kinahanglan pa kini sa hustong proseso.
Matud pa usab ni Excutive Assistant IV Dante Bagarinao, nga ang probinsya migahin kini ug P27 milyones kapin kon kulang alang sa tibuok probinsya.
Ang maong kalihukan gitambungan usab nila 3rd District Board Member Patri “Jing” Chan, Dapitna City Councilor Bembem Hamoy ug uban pa. (PIC-mbmontederamos)
