Mikita sa ₱ 260,163.25 sa 9.73 toneladang klase klaseng utanon ug uban pang produkto sa agrikultura sulod lamang sa tulo ka adlaw nga Saulog sa Enhanced Gasang Bahandianon sa Umahan (eGBU) nga gipahigayon sa Capitol Grounds, Disyembre 9-11.
Kini ang nasayran gikan ni Provincial Agriculturist Ms. Maybel Bustalino diin ang mga resipienteng mag-uuma nagagikan sa primero, ikaduha ug tersero distrito.
Sa first first district, ang mga resipiente mikita sa ₱ 73,751; second district – ₱ 86,742 ug sa tersero distrito mikita kini sa ₱ 99,670.25.
Dugang ni Ms. Bustalino nga ang maong kalihukan gihimo isip pagpasalamat sa nakab-ot nga kalampusan sa Enhanced Gasang Bahandianon sa Umahan (eGBU) Program sulod pa lamang sa pipila ka bulan.
Ang eGBU Program pagpalig-on usab kini sa mga mag-uuma giatubang karon nga krisis sa COVID-19.
Ingon man, matag Miyerkules gihimo ang Taboan sa eGBU sa Office of the Provincial Agriculturist Grounds aron usab sa pagtabang sa mag-uumang resipiente sa maong programa sa paghandus sa ilang produkto.
Nasayran nga sulod pa lamang sa 9 ka bulan, miabot na sa usa ka milyon ka pesos ang kita sa eGBU Taboan, adunay 7,554 ka myembro sa 258 ka organisasyon, 122 ang nahimo nga Communal Farm Facilities, 2 ka Poultry Production Projects nga anaa nahimutang sa Barangays Tinglan ug Alvenda lungsod sa Mutia, 2 ka Swine Production Projects sa Barangays Gabu ug Osukan, lungsod sa Labason, adunay Goat Production Project ang nahimo sa Brgy. Tiniguiban, lungsod sa Leon Postigo.
Naplastar na usab ang eGBU Agribusiness and Marketing Assistance Services.
Ilawum sa pagdumala ni Ms. Bustalalino, ang eGBU Program naka-establisar na usab kini ug partnership sa Department of Agriculture ug TESDA.
Nasayran nga ang eGBU Program usa sa nanag-unang programa sa administrasyon ni Governor Roberto Uy dinhi sa Zamboanga del Norte sa natad sa agrikultura aron sa pagtabang sa mga mag-uuma alang sa ilang kapanginabuhian.
SA eGBU, “Mag-uumang makugihon, Panginabuhi malambuon”.
(Provincial Information Center-mbmontederamos)
