Malampusong gipahigayon ang 2ND Quarterly Meeting sa City Anti-Drug Abuse Council inubanan sa presensya sa Philippine Drug Enforcement Agency (PDEA) kaniadtong Abril 19, adlaw’ng Lunes, ning tuiga didto sa Livelihood Skills Development and Enhancement Center (LSDEC), Brgy. Galas ning dakbayan nga nagsugod sa may ala-1:30 sa hapon.
Ang nasangpit nga panagtigum ang gitambongan ni City Mayor Darel Dexter T. Uy uban kanila ni PDEA Provincial Officer, Agent Marvin Santos, kinsa mituki sa “Overview” kabahin sa Balay Silangan, DILG Dipolog City CLGOO, Ms. Sherrie Charlota Machutes, City Social Welfare and Development Officer, Ms. Arlene O. Jatico, Livelihood Skills Development and Enhancement Center (LSDEC) Operations Manager, Ms. Flora V. Atamosa, Schools Division Superintendent Virgilio P. Batan Jr., Chief Probation and Parole Officer, Ms. Jeanette F. Requina, City Information Officer, Mr. Lorenzo A. Aseniero II ug mga representantes gikan sa Department of Labor (DOLE) ug Technical Education and Skills Development Authority (TESDA).
Tumong sa maong panagtigum ang paghisgot sa laraw nga makatukod og Balay Silangan dinhi sa dakbayan sa pakigtambayayong sa Kagamhanang Lokal ug sa buhatan sa PDEA lakip na ang mga igong lakang nga pagabuhaton nga maimplementar kini.
Tipik sa mensahe ni Mayor Uy atol sa panagtigum ang iyang pag-awhag sa mga nagkalain-laing ahensya sa gobyerno nga magtinabangay ug makigtambayayong sa ilang kaugalingon aron mahimong makab-ot ang mga tinguha salang sa kaayohan sa katawhan lakip na ang pagpasalamat sa presensya sa PDEA nga nagiyahan sila sa husto nga proseso sa pagpaimplentar sa nasangpit nga programa.
Nagpasalamat usab si Agent Santos sa pag-imbitar kaniya sa nasangpit nga tigum lakip na sa nadawat nga suporta gikan sa Kagamhanang Lokal ngadto sa nasangpit nga buhatan sa mga programa niini.
(City Information Office-jnp)
