Malipayon nga nakabaton na og sakramento sa kaminyuon ang 27 ka mga paresan nga dungan gikasal sa simbahan sa Saint Augustine pinaagi sa tabang ni 1st District Congressman Rolando ‘Klarex’ Uy dinhi sa dakbayan sa Cagayan de Oro karong Lunes, Disyembre 28.
Sumala pa ni Allan Balabat, 27-anyos nga taga Brgy. Kauswagan wala gayud sila magdahom nga human sa unom ka tuig nga panag-uban sa iyang kapikas nga si Ann Elbamo, 26, makasal sila sa simbahan pinaagi sa suporta ni Congressman Klarex.
“Salamat kaayo Congressman Klarex, wala gyud mi mag-expect ingon ani ang mahitabo. Sa mga wala pa gikasal, akong tambag nga mas maayo gyud nga makasal para may blessings,” matod niya.
Ang nasampit nga paresan ang kabahin sa 27 nga dungan gikasal sa simbahan pinaagi ni Officiating Minister Msgr. Florencio ‘Boy’ Salvador.
Ang matag usa ka paresan nakadawat og usa ka litson, cake, ug wine gikan sa pamilya ni Congressman Klarex.
Naandan na sa pamilya ni Congressman Klarex nga mosuporta sa ‘Kasalan ng Bayan’ gumikan alang sa kongresista usa ka bililhon nga butang sa magtiayon nga makasal ug makabaton gayud og sakramento sa kaminyuon. (City Information Office)