GENERAL SANTOS CITY— PATAY ang duha ka mga suspetsado nga silang Josefino Emperado ug Jan Eric Jaud nga responsable sa basag kotse dinhi sa dakbayan sa GenSan human nga nakigpinusilay sa kapulisan alas 11:40 ang takna sa gabii.
Base sa inisyal nga report sa Police Station 3, samtang nagpatrolya ang kapulisan tungod sa sunod sunod nga kaso sa basag kotse nga natigayon sa ilang Area of Responsibility.
Gikabutyag nga naaktuhan sa kapulisan ang mga suspetsado sa Ventilacion Street, Brgy. Lagao nga gibuak ang sakyanan ni Harold Burgos nga nakaparking apan dihang namatikdan ang kapulisan paspas nga misibat ang mga suspek sakay sa ilang sakyanan nga dunay plate no. WEC 414 hinungdan nga gigukod sila sa kapulisan.
Pagkahidangat sa Amado Fenequito Street, Brgy. Lagao, gipabuthan sa mga suspek ang migukod nga mga pulis hinungdan nga sila gibalsan og miresulta sa pagkaigo sa mga suspek nga hinungdan sa ilang kamatayon.
Narekober sa posisyon sa mga suspek ang usa ka unit sa caliber .45 ug .38 revolver.