Cebu City – Nakalabang na sa unang pagbasa sa hunta probinsiyal ang record-breaking nga badyet sa Kapitolyo nga ₱ 15 bilyones nga labaw og 25 porsyento sa gahin ning tuiga nga ₱ 12 bilyones lang.
Ang naasoyng badyet gi-refer una ngadto sa committee on budget and appropriations human matuki sa regular session.
Dakong bahin sa maong gahin o ₱ 6.2 bilyon o 41 porsyento gitagana sa social services nga naglakip sa pagpatuman og bag-ong mga infrastructure projects ug pagpalambo sa existing na; pagsustiner ug pag-upgrade sa health services; ug pagpalapad sa water supply sa lalawigan.
Suma pa ni Gob. Gwen Garcia, gihatagan og prayoridad sa nahisgotang badyet ang mga imprastraktura nga makatabang sa panginabuhi sa mga Sugboanon lakip ang maayong serbisyo sa panglawas sa mga ospital.
Ang ubang bahin sa gahin gipunting sa economic services nga miangkon og ₱ 5.9 bilyon ug general public services nga ₱ 2.9 bilyon.
Sa iyang bahin, si Bokal Glenn Soco sa ikaunom nga distrito, chairperson sa committee on budget and appropriations, miingon nga nagplano sila aprobahan ang badyet sa dili pa matapos ang Nobyembre kon walay iduso nag kausaban.
Matod ni Soco, target nila nga magpasiugda og budget hearing liwas sa Kalagkalag.
(Jhon Tadlip/JTY)
(Source & Photo: Cebu Provincial Government)