Sugod karong buwan sa Disyembre gipaabot nga mapahimuslan sa mga call center agents ang libre nga sakay pinaagi sa mga air-con buses. Nagpinirmahay na og kasabotan ang Cebu City government ug ang Metro Rapid Transit Services Incorporated (MRTSI) nga maoy operator sa MyBus alang sa free bus rides sa mga trabahante sa Cebu I.T. Park.
Si Cebu City Mayor Tomas “Tommy” Osmena ug Cebu City Councilor Mary Ann delos Santos maoy mirepresentar sa siyudad sa gipirmahan nga Memorandum of Agreement (MOA) samtang ang MRTSI girepresentahan ni Arnold Famudulan, General Manager sa MyBus. Gibutyag ni Osmena nga ang libreng sakay sa bus dili limitado alang sa mga call center agents. Gitataw ni Osmena nga si bisan kinsa nga nanarbaho panahon sa kagabhion mahimong makapahimulos sa libreng sakay sa bus bisan pa kadtong dili mga residente sa Cebu City.
Ang MRTSI mopakatap sa tulo ka mga buses niini aron magamit sa mga trabahante nga makasakay nga libre. Ang libre nga bus service mapahimuslan sa hingtungdang mga trabahante sugod sa 9 p.m. hangtud sa 5 a.m.
Ang rota sa MyBus nga mopasakay nga libre sa mga trabahante magsukad sa Cebu I.T. Park hangtud sa Andok’s sa eskina Juan Luna Avenue ug M.J. Cuenco Avenue sa Barangay Mabolo, Cebu City.