General Santos City – Obligado matod pa ang mga empleyado sa city hall ug Sangguniang Panlungsod nga ibalik ang unsa mang nadawat nga monetary incentives, ilawom sa Program on Awards and Incentives for Service Excellence o PRAISE nga gitunol sa city government.
Gihimo ni City Councilor, Atty. Franklin Gacal ang opinyon human gideklara sa Commission on Audit nga “irregular expenditure” ang ₱ 23,942,657.84 nga gigahing pondo sa LGU sa maong katuyuan.
Sa gipagawas nga audit report, gipuna sa COA nga lakip sa nakadawat sa maong monetary reward ang Sangguniang Panlungsod, mga Top 10 performing departments, regular, casual ug contractual nga empleyado sa LGU-GenSan, nga dakong kalapasan matod pa sa gitakdang guidelines sa Civil Service Law.
Nasayran nga anaa sa tig-₱ 25,000 ang gitagana nga monetary reward sa giilang Top 10 rated performing departments ug tig-₱ 10,000 sa Top 10 rated employees sa siyudad.
Nagbahad na ang ahensiya sa pag-isyu og Notice of Disallowance sa maong gipagawas nga pondo sa city government.
“That is sad news for everybody kung ang desisyon gyud sa COA nga i-disallow. Wala tay mahimo and we will be obligated to return the money,” ang tipik sa pamahayag ni Gacal.