El Oficina del Salud ya abre otravez con el tresientos veinte cama capacidad “mega isolation facility” na Barangay Talisayan por causa ta omenta el activo caso del coronavirus disease-2019 aqui na ciudad.
El facilidad que ya costa con el govierno local siento treynta’y cuatro miliones de pesos para el constuccion talli na propiedad del Zamboanga Economic Zone and Freeport Authority.
Si Doctora Dulce Amor Miravite, el hefe del Oficina del Salud, ya habla cay el primer objetivo ya abre otravez con el facilidad amo para omenta con el capacidad de cama para na maga paciente de Covid-19 aqui na ciudad.
Asegun con Miravite cay el unico facilidad abierto alli na Barangay Pasonanca na critical nivel ya porcausa na subida del activo caso de Covid-19.
Si Miravite ya habla cay tiene ya catorse paciente de Covid-19 el admitido ahora na mega isolation facility desde martes este semana.
Base na lista del Oficina del Salud local cay el ciudad tiene el suma total de tresientos sincuenta’y tres activo caso de Covid-19.
Tresientos cuarenta’y uno del suma total de tresientos sincuenta’y uno el ya adqueri por medio de transmision na comunidad, y el resto compuesto de seis maga personas detenido na carcel del pulisiya, tres maga individual autorisao sale na casa, dos maga preso na city jail, y uno peronaje del Bureau Jail Management and Penology. (Bong Garcia, Jr.)