Cebu City – Magsilbi nga leksyon sa pagpangandam ang magnitude 7.3 nga linog nga mitay-og sa probinsya sa Abra, Cordillera Administrative Region (CAR), alang sa usa ka membro sa Cebu Provincial Board.
Si Board Member Glenn Anthony Soco, chairman sa committee on infrastructure, mihulagway nga ang ” experience will always be the best teacher’.
“Kita nga naa karon diri nga wala ma-affected, we have to learn also from the experience didto sa Luzon,” pasabot ni Soco.
Gihimug-atan ni Soco nga ila sab nga gibati ang nahitabo sa ilang “brothers and sisters”, nga apektado sa linog.
Pasado alas 8 sa buntag, Miyerkules, Hulyo 27, daling mikatap ang magnitude 7.3 nga linog sa Abra.
Nakuhaan sab ug lain-lain mga hulagway ug video atol sa pagtay-og sa mga apektadong lugar.
Ubay ubay ang mga nanga guba nga mga panimalay, istraktura ug nang liki nga mga karsada.
Apektado ang daghang mga simbahan sa Abra, diin dunay mga nangliki ang atubangan ug nanga hugno nga kampanaryo.
Makita sab sa mga hulagway ang mga auto ug mga sakyanan nga nadat-ugan sa mga konkreto nga butang ug mga bato.
Lakip nga apektado ang Benguet, diin dunay building nga nahugno.
Nasinate sab ang linog sa ubang lugar sa Luzon, hasta sab sa Baguio.
Sama sa Abra, ang Sugbo duna say mga karaan nang mga istraktura ug mga simbahan.
Tuig 2013, mitay-og sa kabisay-an ang kusug nga linog nga milumpag sa mga panimalay, simbahan ug mga istraktura sa lalawigan sa Bohol, lakip na sab sa Sugbo. (Jhon Tadlip)
(News & photo courtesy of Abra Provincial Government | Phivolcs | contributed photo)