Tallon dagiti immuna a nabenepisyaran nga immawat iti accident insurance ti gobierno probinsial nga inpaay ni Gob. Mathew Marcos Manotoc babaen iti Metro Ilocos Norte Council wenno MINC.
Daytoy ket kalpasan a personal nga inyawaten ti gobernador iti sobre kadagiti miembro ti pamilya dagiti naaksidente a tricycle drivers a tinulungan iti probinsia.
Dagitoy ket dua a taga Laoag City ken maysa a taga Banna Ilocos Norte. Segun iti gobernador, daytoy ket kas tulong ken pannakipagrikna pay laeng ti probinsia kadakuada gapu iti pannaka aksidente da bayat nga agpaspasada.
Inlawlawag ni Atty. Nikki Pilar iti MINC Office a ti accident insurance ket inaramid laeng ni Gob. Marcos Manotoc iti daytoy a tawen a no maaksidente ti maysa a public utility vehicle drivers ket ibaklay ti probinsia iti magastos. 30 ribu agingga iti 50 ribu a pisos ti maipaay a MINC accident insurance iti maysa a PUV driver a rehistrado iti MINC.
Mamati ni Atty. Nikki a dakkel a tulong daytoy iti maseknan a pamilya bayat a saan pay a makapasada da.
Kabayatan na, indanon met ni Mrs. Analyn Agustin a taga barangay Camanggaan, Laoag City ken dagiti dua pay a kadua na nga immawat iti tulong manipud iti probinsia ti nalaus a panagyaman da ken ni Gob. Marcos Manotoc gapu iti dakkel a tulong ken ayat na iti pamilya da. (Cita Macalipis)
(Source: Provincial Government of Ilocos Norte)