Hingpit karon ang gihimong pagpangandam sa Zamboanga del Norte Police Provincial Office (ZNPPO) sa umaabot nga piniliay sa Barangay ug Sangguniang Kabataan nga ipahigayon karong umaabot nga Oktubre 30, 2023.
Matod pa ni ZNPPO Director PCol. Glenn M. Dulawan, nakalatag na ang planong pansiguridad human ang gipahigayong Joint Peace and Security Council (JPSC) meeting ug serye sa tigom uban sa Armadong Kusog sa Pilipinas ug mga civic groups.
Patin-aw pa sa opisyal nga ang PNP maoy natahasang maghatag ug siguridad sa mga ballot boxes nga gamiton sa umaabot piniliay gikan sa paghatod niini sa matag munisipyo hangtud na sa pagkahuman sa eleksyon.
“Misaad ang AFP ug 200 ka mga sundalo karong umaabot nga piniliay, samtang dili momenus sa 4,000 ka mga civic groups ang mipasalig nga motabang aron masiguro nga mahapsay ug malinawon ang umaabot nga piniliay,” matod pa ni PCol. Dulawan.
Nasayran usab gikan kang Col. Dulawan nga ang mga kandidato ug 12 ka lungsod sa Zamboanga del Norte nakalagda na ug ka peace covenant, may kalabutan sa umaabot nga piniliay.
Base sa kasaysayan, 28 ka mga barangay ang giilang Area of Concern, diin 20 ang anaa sa category orange ug 8 ang ilalom sa category yellow, samtang ang 1 ka barangay sa lungsod sa Sirawai nga naa kanhi sa category red ang giwala na sa talaan uban ang pagtugot sa Intelligence Unit.
Naglaum si PCol Dulawan nga sa gipakitang kooperasyon ug paglagda ug peace covenant sa mga kandidato, magmalinawon ug mahapsay ang umaabot ng piniliay sa Barangay ug Sangguniang Kabataan karong Oktubre 30.
(Source: Provincial Information Center ZaNorte Facebook page)