El Western Mindanao Command (Westmincom) ya honra con un official del Australian Defence Force quien ya servi como un oficial de enlace militar o military liaison officer dentro de seis meses na Campo Navarro, aqui na ciudad de Zamboanga, asegun con el militar del Domingo.
Si Coronel Rey Pasco, el interino jefe de personal del mando unificado del Westmincom, ya pone el medalla de accion civica militar na pecho de Capitan Daniel John Dragutinovich na un simple ceremonia del Viernes na salon de Bautista del Campo Navarro que ta servi como el casa del quartel del Westmincom aqui na ciudad.
El ceremonia ya hace cuando si Dragutinovich ya rendi su visitada de despedida con el liderato del Westmincom del Viernes.
El Westmincom ya honra con el eficiencia, devocion na trabajo, y loyalidad ya demonstra si Dragutinovich durante su estada na quartel del Westmincom mientras ta compli su trabajo como el oficial de enlace militar del Australia desde Noviembre 1, 2023, hasta Mayo 6, 2024.
Ya presenta tamen un Plaque de Mando con Dragutinovich como un simbolico de apreciacion del su valuable contribucion na exitoso conducida del the Joint Operations Planning Course (JOPC), un iniciativa conjunta del Westmincom y del Fuerza de Depensa del Australia.
El curso que ya conduci del Abril 15 hasta Abril 19 y ya participa el mga planificadores de operacion, logisticos, y de salud del Westmincom y mga unidades subordinadas.
El objetivo del curso amo para imparte con mga oficiales militar Filipino el mga fundamental del compregennsion compleja del plano integrado militar na nivel de operacion, asegun con el Westmincom.
Con Dragutinovich ay releva si Coronel Richard Jason O’Hara del Army de Australia. (B. Garcia)