El fuerza armada del Pilipinas ya designa dos oficiales superiores como mga diputado comandantes del Western Mindanao Command (Westmincom).
El dos nuevo designao diputado comandantes del Westmincom amo canda Brigadier General Aldrin Annani y si Brigadier General Taharudin Ampatuan.
Asegun con el Westmincom, Si Annani ya asumi na su nuevo puesto del Domingo y ele ya releva con Brigadier General Vincent Incognito, quien ya sirvi serca 12 meses na mencionao mando.
Asegun con el Westmincom, si Annai es un piloto de combate experimentado y ya sirvi le como Deputy Air Logistics Command y como el Wing Commander del Presidential Airlift Wing.
Si Lieutenant General William Gonzales, el comandante del Westmincom, ya comenda y ya rindi su gratitud con Incognito por su excelente actuacion durante su periodo como diputado comandante del Westmincom.
Si Incognito ay asumi na un igualmente importante posicion na Philippine Air Force.
Si Ampatuan ay sirvi como el nuevo diputado comandante del Westmincom para supervisa con el operaciones de defensa exterior cay el mando ay cambia el campaña desde interno para na defensa teritorial.
Si Ampatuan ya sirvi antes como del diputado comandante del 11th Infantry Division antes asumi na su nuevo designacion na Westmincom del Domingo.
Si Gonzales ya extende un calurosa bienvenida con el dos nuevo oficiales del mando.
El ceremonia de cambio de jefe de oficina ya conduci na sala de conferencias del Westmincom na Campo Navarro, Calarian, en este ciudad.
Con el ceremonia ya atende mga oficiales y personajes del Westmincom.
(B. Garcia, photo courtesy of Westmincom PIO)
Â