Un rebelde New People’s Army (NPA) el ya muri na dos separao tirahan con el tropas del gobierno na provincia del Sultan Kudarat, asegun con el militar del Domingo. Asegun con el 6th Infantry Division, el primer tirahan ya socede mga alas 9:30 del Viernes aga na Barangay Sangay, Kalamansig, Sultan Kudarat. El segundo tirahan ya socede cuantos minutos despues na mencionao barangay como el tropas ya hace lagas con el mga ta escapa rebelde NPA, dejando con el de ila muerto uban. Asegun con el 6ID, el mga tropas del 37th Infantry Battalion (37IB) que ta encabesa si Teniente Coronel Christoperson Capuyan ta conduci operacion de seguridad cuando ya man tirahan sila contra con el mga rebele NPA. “El mga enemigos ya escapa despues y ya déjà sila con el de ila muerto uban identificao como si alias Cardo,” el 6ID ya habla na un anuncio. El 6ID ya habla, si Cardo un siguidores de alias Brix del Sub-regional Command Daguma, Far South Mindanao Region del Communist Party of the Philippines-NPA-National Democratic Front. El mga tropas ya recubri un rifle M-16 Armalite con cuatro clip de bala. Si Brigadier General Michael Santos, el comandante del 603rd Infantry Brigade, ya ordena con todo’l unidades serca na lugar del tirahan para pajarea con el mga escapando rebelde NPA. “Ahora, el de amon tropas ya serra todo’l posible tunel del grupo terorista mientras el operaciones militar decisivo ta continua contra canila,” si Santos ya habla na un anuncio. Si Brigadier General Donald Gumiran, el comandante del 6ID, ya alaba con el valenterias del mga soldao del 37IB por defender con el barangay na municipio de Kalamansig. “Este un prueba cay el de aton soldao preparao sacrificia de ila vida na servicio del pueblo. Sin embargo, ta extende tamen yo el condolencia con el familia del persona ya muri na tirahan,” si Gumiran ya habla. (B. Garcia)