Un myembro de grupo Abu Sayyaf ya rindi con maga authoridad na municipio de Tipo-Tipo alla na provincia de Basilan.
Si Coronel Richard Verceles, el operations chief del Area Police Command-Western Mindanao, ya nombra con el myembro de grupo Abu Sayyaf que ya rindi como si Muwadz Amalul, veinte tres años el edad y residente del Barangay Silangkum, Tipo-Tipo.
Asegun con Verceles cay si Amalul voluntaryamente ya rindi con maga oficiales de govierno y fuersa military maga alas dies del Miyerkoles aga na municipalidad de Tipo-Tipo.
Asegun con Verceles cay si Amalul ya entrega un rifle garand cuando ya rindi ele. Si Amalul un conosido siguidores del antes lider de Abu Sayyaf, si Furijui Indana.
Si Indama ya muri na un encuentro con el tropa del govierno del mes de Octubre anio dos mil veinte na munipalidad de R.T Lim, Zambonga Sibugay.
Si Amalul ya rindi despues del serye de negoaticion ya initia el pulis y maga soldier del 18th Infantry Battalion.
Asegun con Tiniente Coronel Cyril Santander, el comandante del 18th Infantry Battalion, cay si Amalul ya admiti cay ya decidi le rindi por causa ya keda miserable de su vida desputes del muerte di Indama. (Bong Garcia, Jr., photo courtesy of Area Police Command- Western Mindanao)