Un high-value personalidad y otro dos suspechao el ya aresta myentras seis sientos ochenta mil de pesos suspechao shabu ya confisca na un campanya contra droga ilegal na un motel aki na ciudad de Zamboanga.
Si Coronel Alexander Lorenzo, Zamboanga City Police Office director, ya nombra con el maga arestao suspechao como canda Kenneth Tan Pang, cuarenta’y tres anios, el high value personalidad; Junior Usman Kirang, treynta’y tres; y si Bensal Jimenez Paradji, veinte nueve anios.
Asegun con Lorenzo cay con el tres suspechao ya aresta maga alas tres veinte sinco del Sabado tarde na un motel alli na canto del calle San Jose y calle Con Navarro alli na Barangay San Jose Cawa-Cawa, este ciudad.
Asegun con Lorenzo cay ya puded confisca con el tres suspechao sien gramos de suspechao shabu que tiene el cantidad de seis sientos ochenta mil de pesos, un cellular phone, y un bag.
Detenido ahora el tres suspechao myentras esperansao planta formal asunto na jusgado contra canila.
Myentrastanto, si Lorenzo ya comenda con el maga pulis quien ya ase el campanya contra droga ilegal que ya resulta na aresto del tres suspechao. (Erica Javier)