Si Brigadier General Alvin Luzon, el comandante del 101st Infantry Brigade, ya recivi con el 45th Infantry Battalion (IB) durante un corto ceremonia de bienvenido que ya hace del Sabado na Barangay Bohe Pahu, Ungkaya Pukan, Basilan.
El ceremonia de bienvenido es un tradicion de acceptada con el nuevo batallon para esta incorporado na control operacional del comandante operativo.
Durante el programa, si Tiniente Coronel Michael Colanta, el comandante del 45IB ya saluda con Luzon que ta significa cay ta reporta sila para trabaja.
Despues que ya reconoce con el saludo, ya ofrece la mano si Luzon con Colanta, un simbolo de aceptacion con el 45IB como parte del 101st Infantry Brigade.
Na su mensaje, ya expresa si Luzon su confidencia cay el llegada del 45IB como omento tropas ay mejora el operacion y actuacion del 101st Infantry Brigade como un pareja de paz y desarollo na isla del provincia del Basilan.
Ya ase acorda si Luzon con el mga tropas del 45IB el de ila papel y esencial trabajo como parte el 101st Infantry Brigade.
Ademas, si Luzon ya expresa su gratitud con Major General Ignatius Patrimonio, comandante del Task Force Orion, por el imbiada del omento tropas na Basilan para reforza el campaña de seguridad.
Ya expresa tamen gratitud si Luzon con el liderato del Western Mindanao Command y Philippine Army por el supora con su mando y extendida de ayuda durante el designada del 45IB.
Con el ceremonia de beinvendio ya atende el otro mga oficiales del militar, provincia, municipio y del barangay. (B. Garcia, photo courtesy of 101st Infantry Brigade)