El Tricycle Adjudication Board (TAB) ya renova ya 1,230 franquicia del operaciones de triciclo na ciudad de Zamboanga desde’l dia de Lunes, Enero 6.
El TAB ya habla, el renovacion del franquicias de triciclo, que ya prinicipa del Enero 2, ta hace na Centro Latino del Paseo del Mar.
Asegun con el TAB, el 1,230 renovao franquicias amo parte del mas de 4,600 unidades de triciclos ta opera na ciudad de Zamboanga base na de ila registracion.
El TAB ya habla, el pago de renovacion es P350 cada franquicia. El periodo del renovacion hay termina na Enero 20.
El TAB abierto desde alas 8 del aga hasta alas 8 del noche na dia del semana y alas 8 del aga hasta alas 5 del tarde durante mga dias de Sabado y Domingo.
El TAB ya habla, el proceso de renovacion ta inclui el siguientes pasos: escribi na forma de renovacion (notariado) ajuntao con el previo franquicia y el fotocopia del de ila recivo oficial y certifico de registracion con el evaluacion y pago; entonces prepara el necesario requisitos y procede con el inspeccion.
El actual inspeccion del triciclo ta hace tamen na Paseo del Mar.
El TAB ya anima con todo mga operadores de triciclo para completa inmediatamente con el proceso de renovacion para evita sanciones y garantiza liso operaciones. (B. Garcia)