Alas 3 del tarde del Sabado el DOST-PAGASA ya confirma con el Low Pressure Area que ya estima base con el datos na 464 kilometro del Surigao City, Surigao del Norte, y Southwest Monsoon que ay afecta con el weste parte del nacion.
Base con el report del DSWD Region 9, total de 7,190 familia el ya sale afectao na fuerte avenida na maga municipalidad de Molave, Dinas, Tambulig, Labangan na Zamboanga Del Sur y na Ciudad de Zamboanga.
Como initial response del ahensya ya establisya fuerte koordinasyon el mencionao grupo na DRMD, AFP y ZQRS na distribusyon del maga asistencia de alivio na maga ya sale afectao na fuerte avenida.
Asegun na Dromic Report No. 3 del DSWD Region 9 total de 2,898 Family Food Packs el ya distribuhi con el maga ya sale afectao na fuerte avenida. El mencionao total de FFP’s tiene valor de 1,583,728.02 asegun con el report del DSWD Region 9.
Mientras el DRIM ta continua man monitor y koordina con el afectao municipalidad y otros pa maga flood prone areas aki na Zamboanga Peninsula.
Ta esta tambien standby el Quick Response Team del Rehiyon para el posible relief augmentation y man power support que ay necesita el Gobyerno Local entalcaso agrava el situacion, mientras el DSWD Region 9 ta continua repaketa el maga food packs para distribuhi na maga afectao residente na Zamboanga del Sur y aki na ciudad de Zamboanga. (Erica B. Javier)