Un riple de alta calibre del rebelde New People’s Army (NPA) el ya recubri mga soldao na provincia del Bukidnon, asegun con el 1st Infantry Division (ID) del Domingo.
Asegun con el 1ID, con el riple M-16 que ya esconde mga rebelde NPA ya encontra interior del Barangay San Miguel, Talakag, Bukidnon, base na informacion del un antes miembro del NPA nombrao como si Alias Ka Ram.
Si Ka Ram ya rindi recientamente con mga tropa del 103rd Infantry Brigade, asegun con el 1ID.
El 1ID ya habla, con el riple M-16 ya recubri mga personajes del 55th Infantry Battalion (IB) y 1st Special Forces Battalion despues que ya camina sila dentro de dos dias para na lugar donde ya entera con el pusil mga miemros del Sub-Regional Committee 5 (SRC-5) del NPA.
Si Tiniente Coronel Don Villanueva, el comandante del 55IB, ya comenda con el mga tropa militar quien ya recubri con el pusil del rebelde NPA.
Ya expresa tamen gratitud si Villanueva con Ka Ram por su cooperacion y sinceridad de ayudar termina con el problema de insurectos.
Si Villanueva ta ase el llamada con el restante miembros del SRC-5 del NPA para rindi y provecha con el programa de govierno nombrao como el “Enhanced Comprehensive Local Integration Program (E-CLIP).
“Dispuesto el govierno ayuda con ustedes. Tiene buen vida ta espera con ustedes apuera del revolucion. Rindi ya ahora antes que ay queda ya todo atrasao.” Si Villanueva ya habla na su mensaje con el mga restante miembros del SRC-5. (B. Garcia, photo courtesy of 1ID)