Un persona clasificao como “Street Level Individual (SLI)” el ya aresta el mga autoridad na un campaña contra droga ilegal na ciudad de General Santos, asegun con el Area Police Command-Western Mindanao (APC-WM) del Lunes.
El APC-WM ya nombra lang con el arestao suspechao como un tal Jojo, con quien ya aresta na un compra busto del Viernes na Barangay Lagao, ciudad de General Santos.
Asegun con el APC-WM, ya puede recubri na posesion de Jojo mas o menos 8.61 gramos de suspechao shabu enpaquetao na cuatro sobrecitos que tiene el valor de P55,965, un celpon, y P100 dinero.
El APC-WM ya habla, el policia ya conduci el compra busto despues de cuantos dias bisiada na actividades de Jojo en relacion na vendida de droga ilegal.
Asegun con el APC-WM, con Jojo ya detene en preparacion para el plantada del asunto contra conele por violacion del “Comprehensive Dangerous Drugs Act of 2002”. (B. Garcia)
