Zamboanga: Sigidores del founder del Abu Sayyaf ya rindi

0
1

Un myembro del Abu Sayyaf y restante del sigidores del founding-leader del bandido grupo el ya rindi na otoridad ayer na municipio de Maluso, provincia de Basilan.

Asegun con Coronel Richard Verceles, el operations chief del Area Police Command-Western Mindanao, el quien ya rindi amo si Momar Kuto Saluan, cuarenta’y siete años el edad y residente de Barangay Fuente Maluso.

Asegun con Verceles cay si Saluan ya rindi maga alas ocho del miyercoles aga na quartel municipal del pulisiya na Maluso.

Si Saluan un sigidores de Ustadz Abdurajak Abubakar Janjalani, quien ya organisa con el grupo Abu Sayyaf del año mil nueve sientos noventa na Basilan.

Si Saluan ya esconde desde el tiempo ya muri si Janjanlani na un encuentro contra maga pulis del Deciembre Deci-ocho, mil nueve sientos noventa’y ocho.

Si Saluan ya entrega un riple Garand cuando ya rindi ele que ya facilita el combinao personajes del pulisiya, militar y govierno municipal de Maluso.

Asegun con Verceles cay con Saluan ya pone bajo el interogacion y examinacion medical.

Si Saluan ay recivi ayuda financial y otro suporta bajo el programa del govierno para con el maga antes myembros del grupo del bandido Abu Sayyaf.

(B. Garcia)

LEAVE A REPLY

Please enter your comment!
Please enter your name here